ការបំបៅកូនដោយទឹកដោះម្តាយ ពិតជាមានសារសំខាន់ និងជាគ្រឹះដ៏រឹងមាំសម្រាប់សុខភាពទារក

កំពង់ធំ៖ អាជ្ញាធរស្រុកសណ្ដាន់ សហការជាមួយមន្ទីរសុខាភិបាលខេត្តកំពង់ធំ និងអង្គការអាដ្រា នៅថ្ងៃទី២០ ខែសីហា ឆ្នាំ២០១៨នេះ បានប្រារព្ធទិវាសប្តាហ៍ពិភពលោក បំបៅកូនដោយទឹកដោះម្តាយ នៅភូមិងន ឃុំងន ស្រុកសណ្ដាន់ ដើម្បីផ្សព្វផ្សាយដល់ប្រជាពលរដ្ឋនៅមូលដ្ឋាន ឱ្យកាន់តែជ្រាបច្បាស់ពីសារសំខាន់ នៃការបំបៅកូនដោយទឹកដោះម្ដាយ ក្រោមប្រធានបទ ”ការបំបៅដោះកូនដោយទឹកដោះម្តាយ គឺជាគ្រឹះដ៏រឹងមាំនៃជីវិត” ក្រោមវត្តមានលោកស្រី
ស៊ឹម ស៊ីដារ័ត្ន អភិបាលរងស្រុក ដោយមានការជួយឧបត្ថម្ភគាំទ្រពីអង្គការអាដ្រាកម្ពុជា គម្រោងអោប ព្រមទាំងមានការអញ្ជើញចូលរួមពីកងកម្លាំងប្រដាប់អាវុធ អាជ្ញាធរ ភូមិ ឃុំ ប្រជាពលរដ្ឋ សិស្សានុសិស្ស ប្រមាណជាង ៣០០នាក់ ។

លោក កែន ចំរើន អនុប្រធានអង្គការអាដ្រា គម្រោងអោបប្រចាំស្រុកសណ្តាន់ បានលើកឡើងថា ការរៀបចំសប្តាហ៍ពិភពលោកបំបៅកូនដោយទឹកដោះម្តាយមានគោលបំណងដើម្បីពង្រឹងការយល់ដឹងរបស់ម្តាយ គឺ

  • ១. ម្តាយត្រូវចាប់ផ្តើមបំបៅទារកដោយទឹកដោះម្តាយភ្លាមក្នុងអំឡុងពេល១ម៉ោងដំបូងបន្ទាប់ពីសម្រាលកូនរួចដែលនឹងត្រូវផ្តល់ទឹកដោះដំបូងដ៏មានសារៈប្រយោជន៍។
  • ២. ត្រូវផ្តល់ទឹកដោះម្តាយតែមួយមុខគត់ដល់ទារកក្នុងអំឡុងពេល៦ខែដំបូងនៃជីវិតរបស់ពួកគេ ។
  • ៣. ត្រូវបន្តបំបៅកូនដោយទឹកដោះម្តាយ រហូតដល់កុមារអាយុ២ឆ្នាំយ៉ាងតិចព្រមទាំងផ្តល់អាហារបន្ថែមឱ្យបានសមស្រប ។

លោកស្រី ស៊ឹម ស៊ីដារ័ត្ន បានលើកឡើងថា ដោយយោងតាមរបាយការណ៍នៃការអង្កេតប្រជាសាស្ត្រ និងសុខភាព ឆ្នាំ២០១៤ បានបង្ហាញអំពីលទ្ធផលនៅក្នុងប្រទេសកម្ពុជា ការអនុវត្តបំបៅកូនដោយទឹកដោះម្ដាយពេញលេញ នៃការបំបៅកូនដោយទឹកដោះម្ដាយតែមួយមុខគត់ បានធ្លាក់ចុះពី ៧៣.៥% នៅឆ្នាំ២០១០ មកត្រឹម ៦៤.៦% នៅឆ្នាំ២០១៤។ ការចាប់ផ្ដើមបំបៅកូនដោយទឹកដោះម្ដាយភ្លាម ក្នុងម៉ោងដំបូង បន្ទាប់ពីសម្រាលរួច និងការបន្តបំបៅកូនដោយទឹកដោះម្ដាយ រហូតដល់អាយុ១២ខែ ត្រូវបានរកឃើញថា ធ្លាក់ចុះពី ៦៥.៣% មកត្រឹម ៦២.៦% និងធ្លាក់ចុះពី ៨៣% មកត្រឹម ៨០%។ បន្ថែមពីនេះ ការផ្ដល់អាហារបន្ថែមមុនអាយុដែលបានកំណត់មានការកើនឡើងគួរឱ្យកត់សម្គាល់ ទាំងនៅតាមទីប្រជុំជន និងជនបទនៅរវាងឆ្នាំ២០១០ ដល់ឆ្នាំ២០១៤។

លោកស្រីអភិបាលរង បានបន្ថែមថា ដោយមើលឃើញពីអត្រានៃការធ្លាក់ចុះទាំងនេះ គឺជាកិច្ចការដ៏បន្ទាន់បំផុត ដើម្បីធ្វើឱ្យការអនុវត្តការបំបៅកូនដោយទឹកដោះម្ដាយតែមួយមុខគត់ នៅទូទាំងប្រទេសមានភាពប្រសើរឡើងវិញ។ ទន្ទឹមនឹងនេះ ក៏បានរកឃើញនូវមូលហេតុជាច្រើន ដែលបណ្ដាលឱ្យមានការធ្លាក់ចុះនូវអត្រាបំបៅកូនដោយទឹកដោះម្ដាយ ដូចជា ការធ្វើចំណាកស្រុក កង្វះខាតចំណេះដឹងអំពីការបំបៅដោះកូនដោយទឹកដោះម្ដាយ ទំនៀមទម្លាប់វប្បធម៌ ការខ្វះខាតការគាំទ្រពីសមាជិកគ្រួសារ និងមានការរីករាលដាល នៃការផ្សព្វផ្សាយលក់ផលិតផលជំនួសទឹកដោះម្ដាយ (ម្សៅទឹកដោះគោផ្សំតាមរូបមន្ត)។

ជាមួយគ្នានោះដែរ លោកស្រីក៏បានផ្តាំផ្ញើដល់ស្ត្រីៗ ដែលម្តាលទាំងអស់ត្រូវយកចិត្តទុកដាក់បំបៅដោះកូនដោយទឹកដោះម្តាយ ដើម្បីជួយកុមារទទួលបានការចាប់ផ្តើម ជីវិតដ៏ល្អបំផុត និងអាចជួយកាត់បន្ថយពីជម្ងឺទៀតផង៕ ដោយៈ CSB

អត្ថបទដែលជាប់ទាក់ទង